Arusha, Dar na Kilimanjaro zaongoza Matumizi ya Dawa za Kulevya

·         Asilimia 95 ya waathirika ni wanaume

·         Asilimia 50 ya wanaopata matibabu hurudia matumizi ya mihadarati

·         Manyara na Arusha mirungi inatumika hadharani

Na Dinah Christian.

 Kutokana na utafiti uliofanywa katika Hospitali ya Kilutheri ya Haydom katika kitengo cha kuwahudumia waathirika wa dawa za kulevya na pombe maarufu kama Amani Ward, asilimia 90 ya waathirika wa dawa za kulevya na pombe ni vijana wenye umri kati ya miaka 20 hadi 40.

Kwa mujibu wa muuguzi msaidizi anayefanya kazi katika kitengo hicho, Naomi Marissa, matumizi ya dawa hizo zinaongezeka pamoja na kuwapo kwa vituo mbalimbali vinavyotoa elimu na kuongeza kuwa hali hiyo ni kutokana na jamii kutokufanya uhamasishaji juu ya elimu inayotolewa.

Takwimu zinaonesha kuwa kati ya mwaka 2011 hadi mwaka 2013 wagonjwa 171 walipokelewa katika kitengo hicho ambapo wanaume walikuwa 162 na wanawake 9 ambao ni asilimia 5 tu ya waathirika ikilinganishwa na wanaume ambao ni asilimia 95

Hata hivyo utafiti unaonesha kuwa 45% hadi 50% (takriban nusu) ya wagonjwa waliopata matibabu hurudia matumizi ya dawa hizo, hali inayoelezwa kuwa inatokana na wagonjwa wengi kutokumaliza matibabu yao baada ya kuona kuwa wameanza kupata ahueni na hivyo kurudi katika utumiaji wa mihadarati.

Pamoja na kitengo hicho kutoa matibabu hayo kwa gharama nafuu lakini bado jamii inauelewa mdogo kuhusu madhara na namna ya kukabiliana na matumizi ya pombe na mihadarati na wagonjwa wenyewe kutohudhuria katika mafunzo na vikao vitolewavyo kwa waathirika wa dawa za kulevya ikiwa ni pamoja na kuogopa gharama za matibabu.

Aidha, takwimu zaidi zinatanabaisha kuwa, waathirika wengi wa mihadarati na pombe waliopata matibabu katika hospitali hiyo kubwa zaidi katika mkoa wa Manyara, wanatokea katika mikoa ya Arusha, Kilimanjaro na Dar es Salaam huku mikoa ya Tabora, Mwanza na Manyara ikiwa na idadi ndogo zaidi ya waathirika wa dawa hizo.

Pamoja na mkoa wa Manyara kuwa na idadi ndogo ya watumiaji wa dawa hizo, lakini uchunguzi wa gazeti hili umebaini kuwa, mihadarati aina ya mirungi inatumika sana na kwa wazi katika maeneo mbalimbali ya mikoa ya Manyara na Arusha. Watumiaji wakubwa wa mirungi ni mawakala wa mabasi, madereva wa magari ya mizigo, madereva wa bodaboda na waongoza watalii

Katika miaka hivi karibuni, Tanzania imejizolea sifa mbaya zaidi kuwahi kuwakumba wananchi wake wanaosafiri nje ya nchi baada ya Watanzania wengi kukamatwa sehemu mbalimbali duniani wakisafirisha mihadarati.

Wengi wa waliokamatwa ni vijana hasa wasanii huku ikisemekana kuwa wimbi la vijana kujiingiza katika matumizi ya dawa za kulevya linazidi kuongezeka kila kukicha. Aidha, uchunguzi wa Mbiu ya Jamii umebaini kuwa vijana wengi hujiingiza katika matumizi ya mihadarati kwa kufuata mkumbo na kupenda kuiga na kujaribu kila kitu wanachokiona, tamaa ya utajiri wa haraka na umaskini uliopindukia.

Wakati wanaharakati mbalimbali, mashirika ya dini na yasiyo ya kiserikali yakipiga kelele ili serikali idhibiti matumizi na usafirishaji wa dawa hizi, bado dawa hizi zipo kila mahali huku ikidaiwa kuwa vigogo ndio wanaoendesha biashara hii wakiwatumia vijana.