Kweli

NANYI MTAIJUA KWELI.....NAYO KWELI ITAWAWEKA HURU....NANYI MTAKUWA HURU KWELI KWELI

Mbiu ya Jamii

Tangaza Biashara yako hapa...wasiliana nasi sasa kwa 0753038005

WELCOME TO HAYDOM CULTURAL FESTIVALS 2013

NORWEGIAN CHURCH AID TANZANIA

NORWEGIAN CHURCH AID TANZANIA
PROUD PARTNERS OF HAYDOM FOUR CORNERS CULTURAL PROGRAMME (4CCP)

Friday, October 18, 2013

TAHARIRI:Tumuenzi Nyerere Kwa vitendo!



Miaka 14 imepita toka Taifa letu lipate msiba mkubwa  wa kutokwa na kiongozi aliyependwa na watu wengi ndani na nje ya nchi yetu. Ilikuwa ni Alhamisi ya tarehe 14 mwezi Oktoba 1999, aliyekuwa rais wa Jamhuri ya Muungano wa Tanzania Benjamin William Mkapa alipoutangazia umma wa Watanzania juu ya msiba huo, ambao uliacha majonzi makubwa sana nchini.

Nyimbo ziliimbwa na maombolezo ya siku 30 yalitangazwa nchi nzima na siku 7 za mapumziko, ili kumuenzi kiongozi aliyekuwa siyo tu alama ya Utaifa wetu, bali pia alikuwa nguzo na tegemeo la bara zima la Afrika.
Miaka 14 baada ya Alhamisi ile iliyojaa majonzi, nchi yetu imesonga mbele bila uwepo wa Mwalimu. Mwalimu hayupo nasi bali falsafa zake zingali hai pamoja nasi, kama wengine waliotutoka walituachia pengo, mwalimu alituachia ubogoyo kabisa.

Wakati tunaadhimisha miaka 14 toka Baba wa Taifa atutoke, ni vizuri tukatambua kuwa kimsingi hatuadhimishi kifo chake bali tunaenzi zawadi ya maisha yake. Hakuna namna nzuri na bora zaidi ya kumuenzi Mwalimu zaidi ya kumuenzi kwa vitendo hasa falsafa zake ambazo zililenga kujenga haki na usawa baina ya binadamu wote. "Binadamu wote ni ndugu zangu, na Afrika ni moja"

"Katika kipindi cha uhai wake, mwalimu alikemea rushwa na kila aina ya uonevu, mwalimu alijenga umoja wa kitaifa na kutufanya Watanzania wote kuwa kama ndugu japokuwa tunaasili na tamaduni tofauti zinazoundwa na makabila zaidi ya 120."

 Leo hii, yale aliyokuwa akipigania Mwalimu tumeyasahau, badala yake nchi yetu inaanza kukumbwa na matukio ya Udini na Ukabila huku kukiwa na matabaka baina ya Watanzania, maskini na matajiri.
Mwalimu alitekeleza sera na falsafa zake kwa vitendo, mwalimu hakujilimbikizia mali kama viongozi wetu wa sasa na mwalimu hakupeleka watoto wake wakasome nje kama wanavyofanya viongozi wetu sasa. Mungu alitupa zawadi kubwa sana Watanzania kuwa na mtu kama Mwalimu ambaye hutokea pengine mara moja katika karne nzima katika dunia nzima, lakini hatujaitendea haki zawadi hii na kuienzi badala yake, tunamsifu tu midomoni wakati matendo yetu yapo kinyume kabisa na tunayoyahubiri majukwaani.

Mwalimu hakuwa mfano wa kuigwa barani Afrika pekee, bali dunia kwa ujumla na ameingia kati ya viongozi mashuhuri zaidi duniani katika karne ya 20 akiwa katika kundi moja na akina Franklin Delano Roosevelt, Winston Churchill, Mao na Fidel Castro japo Tanzania ilikuwa nchi changa na moja ya nchi maskini zaidi duniani. Aliheshimika duniani kote hasa wanazuoni wa ndani na nje ya Afrika na kwa kuutambua mchango wake, na misimamo yake iliijengea heshima nchi yetu. Ukisema wewe ni Mtanzania, uliheshimika.

Lakini sasa, hatuheshimiki tena, tumekuwa nchi ya kudharaulika sana siyo tu na mataifa makubwa bali hata na majirani zetu, vijana wetu wamekuwa makontena ya kubeba madawa ya kulevya na nchi yetu imegeuzwa "dampo" la bidhaa feki baada ya kuviua viwanda ambavyo Mwalimu alivianzisha ili kutoa ajira kwa vijana wetu na kuzalisha bidhaa bora nchini. Sasa tunaagiza hadi "toothpick" kutoka China. Tunauza magogo kisha tunanunua samani zinazotengenezwa na vumbi la mbao kutoka nje.

Tumewapa "wageni" migodi yetu na ardhi yetu, tunasafirisha wanyama kuwapeleka nje ya nchi, tunaua tembo ili kuuza meno na mbaya zaidi rushwa na udini vimekuwa kawaida. Kama tunadai kumwadhimisha Mwalimu na maisha yake, tufanye hivyo kwa vitendo na si maneno matupu. Badala ya kuendelea kuomboleza na kuimba nyimbo za "Kama Nyerere angekuwepo" na "Kama siyo juhudi zako Nyerere", tufanye kwa vitendo ili Mwalimu aendelee kuishi nasi katika matendo yetu. Wahenga walinena, "Ada ya mja hunena, kwa muungwana ni Vitendo"

No comments:

Post a Comment

Related Posts Plugin for WordPress, Blogger...

Ohayoda