MIKASA YA MC AMON:Tafadhali Mungu rudia tena sijasikia usemalo.

Muhimu: Orodha ya wanafunzi wanaodaiwa karo ya chuo mwaka 2012/2013.

“KUMB: kama mwanafunzi atashindwa au kuchelewa kulipa kabla ya tarehe iliyopangwa, itamlazimu kulipia asilimia 10 zaidi au kusitishwa kuendelea na masomo yake. malalamiko yote yafikishwe kwa mkuu wa taaluma mapema iwezekanavyo”.

Hivyo ndivyo lilivyosomeka tangazo kubwa kwenye mbao zote za matangazo zilizopo chuoni kwetu ilikuhakikisha kuwa wahusika wanaliona kwa urahisi  na wanachukua hatua zinazotakiwa kwa haraka. Nikisema ni kwa bahati mbaya kuliona tangazo hilo  nitakua ninakosea kwani asubuhi na mapema, wakati niko njiani kuingia darasani hilo ndilo tangazo la kwanza  na pekee kukutana na macho yangu.

 Na ukweli ni kwamba sio kuwa nilikua sifahamu kuwa ninadaiwa ADA, la hasha! ila kwa kweli mara tu nilipoliona tena hilo TANGAZO mwili wangu ulikosa nguvu  na kuanza kutoa kijasho chembamba.

 Moyo wangu ulishtuka sana mithili ya mtu aliyepata habari za ghafla. Hamu ya kuingia darasani iliisha ghafla na  mawazo chungu nzima yakaanza kutembea kupishana kwenye ofisi za  kichwa changu. Nilihakiki tena jina langu ili kujiridhisha nikagundua ni la kwangu kweli na lilikuwa limeeshikialia nambari tatu kati ya wadaiwa sugu kumi  tu kwa wanafunzi takribani 200 wa darasa la mwaka wa pili; baada ya macho yangu kuridhika niliahirisha kuingia darasani, nikaamua kurudi zangu nyumbani ninakoishi ili kutafuta ni jinsi gani naweza kupata hela ya kulipia ada.

Najua wengi mtauliza, Je! huna wazazi au ndugu na jamaa wa kukulipia?  Jibu sahihi ni kwamba wazazi wangu wote wako hai na Baba yangu ni mtangazaji maarufu sana hapa TANZANIA na hata nikitaja jina lake utagundua kuwa si kweli  kuwa BABA yangu hana uwezo wa kutoa msaada wowote katika maisha yangu. 

Sikuwahi kuishi na BABA na MAMA yangu hata siku moja tangu nimezaliwa, Baba na Mama walikutana kwenye starehe wakiwa vijana na huo ndio mwanzo wa mimi kupatikana lakini kipindi mama anajifungua Baba ALIMTELEKEZA na kutuacha tukiwa hatujui pa kuanzia.

Kipindi hicho mama yangu alikua mwanafunzi, kitendo cha yeye kupata ujauzito akiwa shuleni kilimtenganisha na wazazi wake , ndugu ,jamaa na hata marafiki, alibaki kuwa jeshi la mtu mmoja na kusukuma maisha yake yeye kama yeye.

 Nimekulia mikononi mwa mama yangu ambaye ana fanya kila awezalo mimi niweze kuishi hata kwa kubangaiza. Waswahili wana msemo usemao, “uchungu wa mwana ajuaye ni mzazi” ila mimi naomba nirekebishe kidogo, “uchungu wa mwana ajuae ni mama asikuambie mtu”. 

 Mama ndio kila kitu kwangu, moyo wake wa huruma uliombatana na uchungu alioupata kutokana na kutelekezwa na mwanaume asiyejua anachokifanya unamfanya afanye kila awezalo kunitunza na kunitengenezea maisha mazuri “huku akiniusia kuwa na moyo wa utu na kutokuwatendea vibaya watu wengine,kila mara nazikumbuka kauli za mama na zimenipa nidhamu kubwa katika miasha yangu. tangu nikiwa sekondari nilimuahidi kuwa nitakuwa mtii na muangalifu na nikipata kazi yeye atapumzika na nitaanza kumtunza mpaka mwisho wa maisha yangu, lakini sitamsamehe baba yangu na hilo ndilo agano nililoweka kwake na mbele za mungu”. 

Nilipofika “Nyumbani” nilipanda kitandani na kuanza kumlilia Mungu kwa hasira huku nikifahamu kuwa NIME MUASI KWA KUTOKUMSAMEHE BABA YANGU. Kwa kweli sikuwa na msaada mwingine sikuweza kumwambia mama kwa kuwa hali yake ya uchumi ninaifahamu vyema, ananisomesha kwa kukopa huku na huko, lundo la madeni limemuandama, hela ya chakula, kodi ya nyumba na maji vinapatikana kwa ugumu sana, biashara yake ya kuuza mboga za majani anayoifanya barabarani na mitaani ndiyo chanzo cha kipato chetu, huku macho yetu yakimshuhudia baba kila siku usiku akitangaza taarifa mbalimbali kwenye televisheni na kufurahia maisha yake.

Niliendelea kulia kwa muda mrefu hatimaye usingizi ulinipitia na ndipo NDOTO HII ILIPONIJIA.

“

Niliota niko barabarani natembea nikiwa pamoja na mama yangu, mbele yetu tulimuona mwanaume mmoja wa makamo akiwa amezungukwa na vijana anapigwa na watu. Tulipigwa na butwaa ila wale watu  walipotuona walikimbia. Yule mzee alikuwa ameumia sana, tulipomkaribia zaidi tuligundua kuwa ni BABA YANGU, Hasira zilinipanda nilitamani na mimi NIMUONGEZEE KIPIGO KINGINE ila mama alinizuia na akaniomba nimsaidie. 

Ilikuwa ngumu sana kumsaidia kwa kuwa yeye hakuweza kunijali hata kidogo tangu nikiwa tumboni mpaka sasa. Moyo wake wa unyama haukustahili msaada wangu hata kidogo, kwa uwezo alionao mimi sikupaswa kupata shida hata sekunde moja, wakati yeye anakula na watoto na makahaba wake mimi ninakosa hata kipande cha sabuni cha kuogea, nimeishi maisha ya kuomba omba kwa ndugu jamaa na serikali kama mtoto yatima, kumbe nina baba mwenye uwezo na jina kubwa hapa mjini.

 UKIYAJUMUISHA YOTE HAYO SIKUWA NA SABABU HATA MOJA YA KUMSAIDIA NA wakati nawaza nimsaidie au nimuache NILISHTUKA.

mmhhhhhhh!!!!! mpaka sasa sijui nianzie wapi kupata HELA YA  ADA ila  pia  sijui maana ya hii ndoto, sina wa kumwambia zaidi ya kuandika ili  WATU WAISOME  TENA ASOMAYE ASOME KAMA MAJI.

 Ila nadhani ndoto hii imekuja kutokana na ugumu wa maisha ninayopata na mawazo juu ya baba yangu niliendelea kutafakari na kung’amua hili na lile na bila kujitambua midomo yangu ikafunguka na kutamka TAFADHALI MUNGU RUDIA TENA SIJASIKIA USEMALO.  

MC AMON 0712000781)